Jæja, nú sit ég á tveimur púðum heima hjá Ásthildi og á meðan ég blogga þá sléttar hún á mér hárið! Snilld, ekki satt? Mikill tímasparnaður... en ef það kemur skyndilegt ARRRG þá hefur stúlkan brennt á mér höfuðleðrið.

Fór á tónleika í Hafnarfirði á vegum UJH í gær, lét Völlu keyra svo ég gæti fengið mér öl. Sem ég fékk mér. Svolítið of mikið af meira að segja... svaka stuð og alles en púff. Vá! Var ég þunn eða var ég þunn daginn eftir í vinnunni... Ekkert eins og tuttugu öskrandi börn til að lífga við þynnku... hápunktur morgunsins var þegar ég þurfti að hlaupa á klósettið til að gubba... LITLA klósettið! How sad am I? Góða fóstrin, að gubba í klósett barnanna!! Jæja. Húrraði mér svo upp í landsþing Samfó og var þræll í smástund. Ekki lengi, nenni ekki að ungliðaþrælast lengur. Og plús fær ný stjórn UJ fyrir að redda okkur geðveikum afslætti á þingið... sumsé sama afslátt og alltaf áður en núna þurfum við að vinna... VINNA! Mikið á móti þessu.
Þarf t.d. að mæta kl. 8 í fyrramálið að þrælast... eiginlega til að kaupa mér frið það sem eftir er móts... landsleiks... nei, landsþings.

Svo er það megagrímuball á morgun, jea! Og svo partíið með Geirfuglunum á vegum Samfó... grrr... ég verð þokkalega weird í grímubúningi þar. Ójæja... ágætt plan svoleiðis.

Er pínu að íhuga aðra "appearance" í alþýðuhúsinu í Hfj. í kvöld, ef ég hætti á það og ef Helgan nær að skola af sér skítinn í tíð fyrir morgunn... hehehe... ætla að drekka kalda flöskubjóriinn sem Ásthildur var að rétta mér... ciao

Jæja, engin komment bárust vegna síðasta bloggs og verð ég því að álykta að bloggið mitt sé bara snilld. Eða þá að enginn lesi bloggið. Sem gerir það að aðeins minni snilld.

Góðar fréttir eða slæmar? Pínulítið af hvoru tveggja, haaa? Ég er búin með Buffy. Að eilífu. En Angel er enn til, svo heimsendir er ekki enn mættur (enda kom Buffy snilldarlega í veg fyrir það í síðasta þættinum). Hmmm.

Á aðeins minna lúserlegum nótum þá var ég að eyða ofboðslega miklum peningi í eitthvað aaaafskaplega gagnslaust. Og það er alltaf gaman. Kúl í eitt kvöld. Eða bara verulega, verulega skrítin. Ég get ekki sagt hvað þetta er fyrr en eftir þarnæstu helgi... þá er sko Halloween partí hjá Tinnu og Coley. Og landsþing Samfylkingarinnar. Og útskriftarveisla hjá Sverri. Gúlp. Verð deffinitely kúl í einu partíinu. Veit ekki alveg hvernig leyndó-grímubúningurinn fer í flokksbræður og systur í Hafnarfirði. Þetta verður betra en á síðasta landsþingi þegar ég og Ólafur Kolbeinn skiptum um föt! He he he. Og þó.

Ég veit ekki alveg hvernig mér líður með partí þessa dagana. Annað hvort er mér ekki boðið í neitt (sbr. síðasta helgi) eða þá að það er eitthvað þrennt að gerast á sama kvöldi (sbr. þarsíðasta helgi og þarnæsta). Sem er bara illgjarnt. Fólk ætti að skipuleggja sig betur svo það geti verið fullvisst um að ég komist. Ég er mjög til í að ræða svona mál.

Annars hafa verið tveir krakkalausir dagar í vinnunni. Svona ætti leikskóli alltaf að vera. Það var skipulagsdagur í dag (og einhver þarf að segja þessum leikskólakennurum að lambalæri er ekki a la mode í hádegismat nú til dags) og á morgun (tæknilega, í dag) er námskeiðsdagur og við erum að fara að læra að þæfa ull. Sem er langþráður draumur hjá mér. Nei, í alvöru, ég er það sorgleg.

Þannig aaaað, ég ætla að renna yfir smá texta fyrir vin minn og svo ætla ég að fara að sofa og svoooo fer ég að þæfa og svoooo er partí hjá Doju og svo á laugardaginn er Hjalló kvaddur (amma var að selja húsið sitt) og svo fer ég í útskriftarveizlu.
Góð helgi. Vonandi fæ ég ekki sinuskeiðabólgu af þæfingunni, ælupest og verð barin. Hahaha! Það væri samt svolítið fyndið.

Hmmm. Umfangsmiklar fegrunaraðgerðir virðast ekki hafa borið árangur. Nýju augabrúnirnar eru allsvakalegar. Ég er eiginlega eins og Brooke Shields á sterum. Eða Bert í Sesamy Street (eða var einbrúningurinn kannski Erny?). Allaveganna... pínulítið grimmileg á svip... grrrr.... urrrggg... sem fer vel við reiða feminista stimpilinn minn. Rrrrrreiða rrrreiða konan ég. Urrrrggg...

Leyfið mér því að tuða... ég þoli ekki Jay Leno, hann er leiðinlegur... og ég þoli ekki...
Nei, þetta gengur ekki.
Ég er ekkert í vondu skapi. Ég er lítill sólskinsmoli og það er ekkert við því að gera. Sól, sól, sól.
Hmmm... þetta er allsvakalegt. Veistu samt hvað er asnalegt? Allir þessir snilldarlegu hlutir sem mér dettur í hug að skrifa á bloggið þegar ég er í baði eða í vinnunni eða svoleiðis... ég er hreinn snillingur uppí kollinum. (Og sms-skeytum. Ég er mjög góður sms-ari. Snillingur.) En svo er ég eitthvað óskaplega andlaus á blogginu.

Svo er ég líka svoddan tepra, ég nefni aldrei nöfn í neikvæðum tengslum, tala ekki um kynlíf, sambönd eða flest það sem að sjálfsögðu fyllir huga ungra telpna. (Úff, 25 að verða 26 er víst ekkert svo ungt, eða hvað). Ég þyrfti kannski að krydda bloggið svolítið (nú svitna sumir, hversu reið og bitur er reiði, bitri feministinn, haaa)?
Pólitísk hneyksli, ég gæti gert svoleiðis... eða svona, hvaða þingmaður er verstur í drykkju eða lauslæti... eitthvað svoleiðis... tekið breska pólinn... eða bara fræga fólkið... var t.d. að frétta að Bxxxxxxa Hxxxxxl væri kxxfíkill... sko! Nei, ég beilaði meira að segja á þessu. Ég gæti sagt frá hverjum vinir mínir hafa sofið hjá, eða hverjum ég hef sofið hjá. Hvað finnst þér?
Komment sendist á sidnyrb@hotmail.com

Jæja, sælinú allir saman. Aaaaallir saman. Geri ráð fyrir þúsundum lesenda...

Ég er mjög dugleg stelpa. Litla, bláa hjólið mitt var farið að ryðga óttalega, aðallega á stýrinu. Í stað þess að horfa upp á skemmdirnar skellti ég mér í BYKO og keypti silfurlitt Hammerite (má mála yfir ryð...), pússaði fákinn og skellti yfir skellurnar. Er ofurstelpa. Ætti að hafa eigin þátt á Skjá einum... "Brynka bætir" eða "Bryndís byggir" eða kannski bara "Bryndís bætir betur" eða "Bryndís byggir bú" eða "Búkollan Bryndís" eða bara "Bryndís brennir birki" eða kannski ég bara snúi mér að prjónaskap.

Jamm. Ætla annars að gera mig frambærilega núna á eftir. Set á mig langþráðan maska (unglingabólur eiga ekki að vara í yfir þrettán ár. Það er bara illgjarnt) og kannski lita litlu albínóa-augabrúnirnar og kannski, ef ég nenni, set á mig brúnkukrem (ætti brúnka ekki að vera skrifuð brunka samkv. ng-nk reglunni...)(ahaha, nei, ég er ekki svo vitlaus, Ragnheiður Briem sálug kenndi mér að líta til upprunans, haaaa, og ég er sko ekki brun heldur brún stelpa)(eða samt bara hvít eiginlega)

Svo verð ég ýkt sæt og næ mér í kæró á Airwaves... haha... mhmm... (er hætt á grúppíutímabilinu... þrír gítarleikarar í röð var nú bara fríkí þarna um árið... :-S)
Nú ætla ég að leita uppi listmálara, draugasafnara og menn sem mála olíutanka úti á landi. Eða kannski barasta háskólanema, klósettkafara og einlæga aðdáendur Bubba sem byggir.

Eða bara hætta þessu öllu saman og fá mér kött. Djöfull. Er með ofnæmi fyrir köttum. Helv. kettir. Get þar af leiðandi ekki endað sem piparjúnka, sem er ágætt útaf fyrir sig. Meira kynlíf. Vonandi. (ögh, fékk fríki hugartengsl þarna. Með kettina. Best að halda sér saman.)

Hef komist að því að ég er ekki einhverf, með einungis sjö stig af fimmtíu. Fimmtíu verandi mjög einhverfir... meðaltal karla er 17 og kvenna 15... svo ég er eiginlega óhverf. Bendi á nýja tengla: Kolla og Guðrúnu á vefnum hjá mér!!!

Jæja, nú er ég komin aftur! (eins og ég fari eitthvað) Valla sagði mér að síðan mín væri þreföld á breidd, en hún er það ekki hjá mér... hmmm... er alveg að fara að laga þetta allt saman...

Annars er ýmislegt búið að gerast, landsþingið gekk vel og líst mér bara ansi vel á nýkjörna framkvæmdarstjórn. Sérstaklega á ritarann. Djöfull er hún sæt. Og klár. Etc. Svo var vikan atburðarík, því miður ekki prenthæf, en atburðarík. Og svoo...

Svo var ég barin. Lúbarin. Og ég vildi að ég gæti sagt að ég hefði varið mig hetjulega og sýnt kellunni í heimana tvo en nei... haldiði að ég hafi barasta ekki vælt eins og barn. Eins og barn! Úff. Annars var þetta all svakalegt og mín á leiðinni á lögreglustöðina á morgun að leggja fram kæru. Málið er að ég fer með frænku minni og frænda á kaffihús á föstudagskvöldinu. Svo kemur eiginkona frændans og vill eitthvað ræða við hann. ÓK. Svo fer hún og sest út í horn. Svo er ég bara að tala við frændann þegar fröken Hnefi, sú hin sama og áður, kemur hlaupandi og byrjar að lemja hann í hausinn. Fast. Ég stend upp og segi hetjulega (þetta var áður en ég fór að væla, muniði) þú ræðst ekki á hann XXX! Þá ræðst hún á mig, grípur um fingur mér og snýr mig niður, kýlir mig í smettið og sleppir ekki puttanum, sem var við það að brotna, fyrr en ég bít í leðurjakkann hennar (ok, hún var í honum). Þá rífur hún í hárið á mér, þvingar mig niður og kýlir enn meira í andlitið á mér. Ég er eiginlega enn í sjokki. Róleg með ofbeldið, vinan. Það var eins og hún væri með hundaæði.
Svona fólk á náttúrulega að vera í alvarlegri meðferð. Við fórum svo upp á Slysó, frændi minn þurfti á læknisaðstoð að halda, þ.m.t. stífkrampasprautu, og ég lét taka áverkavottorð. Er að drepast í stokkbólgnum fingrinum, helaum á nefinu eftir kýlingar, marin á kinnbeini og illt í hársverði og eyra.

Ef ég vissi að svona köst væru einsdæmi hjá henni léti ég kannski vera að kæra, en ég veit vel að svo er ekki og sá sem verður oftast fyrir þessu vill ekki kæra. Ég ætla ekki að co-a með svona fólki og hananú.

Hverjum dettur annars í hug að bara ráðast á einhvern. Og lemja þá. Ég meina lemja eins og kýla og sparka og svo framvegis. Með virkilegum tilgangi að meiða. Mér datt ekki einu sinni í hug að lemja hana til baka, ég var bara gáttuð og vildi komast undan henni.

Jæja, annars er komin ný vika og gubbupestin ógurlega að mestu liðin hjá. Eins og allir góðir starfsmenn á leikskóla mæli ég tímann í helstu umgangspestum. En þessi var allskæð. Ég sjálf fékk hana upp og niður, hehe, og var óglatt fram eftir allir helgi, síðustu helgi en ekki þessari...

Tala ég bara um líkamlega áverka og sjúkleika á þessari síðu?

Jújú, svo fór ég í tvö afmæli á laugardeginum, snögglega til Kalla Th. með Nöfnu og svo til Völlu en komst því miður ekki til hennar Birnu. Og svo fór ég í sex ára ammli hjá Magnúsi Nóa og Hlöðveri Skúla... rosa fjör. Jamm... svo er ég að fara að hitta Lóu spóu á kaffihúsi núna á eftir.

Mun blogga meira, og þá minna um líkamsmeiðingar. Með kærri kveðju,
Lúbarða-Brynka

Hulló. Minn er með gubbupest, bömmer mar. Annars er landsþing UJ núna um helgina, og hefur verið að nógu að huga þar... daddaræ... Gunna er komin til Svíþjóðar (vinir mínir flýja allir land) (eða kannski bara mig) og var kveðjupartí hjá henni um helgina. Það var rosa fínt djamm, þrátt fyrir nokkurn fjárskort af minni hálfu og þarafleiðandi sopafylleríi... mjög óþolandi. Fyrir aðra, fínt fyrir mig. Jæja. Nú hefur peningabáturinn aftur siglt að landi. Ég fann gamla ávísun í pappírunum mínum í gærkvöldi... jíhaaaa... gaman að finna peninga. Sérstaklega þúsundir. Því miður ekki tugþúsundir, en hey, ekki sniðugt að skoða gefins hest í munninn... enskuvæddaBryndís. (Já, ég veit þetta er vitlaust þýtt...)
Sjáumst hress og kát á landsþingi UJ!